தூத்துக்குடி மாவட்டம், சேர்வைக்காரன் மடம் ஊராட்சி காமராஜ் நகரில் செயல்பட்டு வரும் டாஸ்மாக் கடை எண் 10144-ஐ அகற்ற வேண்டும் என பொதுமக்கள் சார்பில் மாவட்ட ஆட்சியரிடம் மனு அளிக்கப்பட்டுள்ள சம்பவம் அப்பகுதியில் பரபரப்பை ஏற்படுத்தியுள்ளது.
மனுவில், குறித்த மதுபான கடை மக்கள் வசிக்கும் பகுதியின் மத்தியில் இயங்கி வருவதால் பெண்கள், மாணவர்கள் மற்றும் பொதுமக்களுக்கு இடையூறாக உள்ளதாக தெரிவிக்கப்பட்டுள்ளது. மேலும், கோவில், தேவாலயம் மற்றும் கல்வி நிறுவனம் அருகில் இருப்பதாகவும், பொதுநலன் கருதி கடையை நிரந்தரமாக மூடி அகற்ற வேண்டும் என்றும் கோரப்பட்டுள்ளது.
இதனிடையே, டாஸ்மாக் கடைக்கு எதிராக தொடர்ந்து குரல் கொடுத்து வரும் சிலர் மீது ஏற்கனவே பல்வேறு குற்ற வழக்குகள் உள்ளதாக மற்றொரு தரப்பினர் குற்றச்சாட்டு முன்வைத்துள்ளனர். கஞ்சா, மிரட்டல், திருட்டு, போக்சோ உள்ளிட்ட வழக்குகள் தொடர்பாக சிலர் மீது காவல்துறையில் பதிவுகள் இருப்பதாக கூறப்படுகின்றது. மேலும், 5 லட்சம் ரூபாய் கேட்டு மிரட்டியதாக சாயர்புரம் காவல் நிலைய வரம்பில் வழக்கு நிலுவையில் உள்ளதாகவும் தகவல்கள் வெளியாகியுள்ளன.
அதேபோல், சிலர் தனிப்பட்ட அரசியல் காழ்ப்புணர்ச்சி மற்றும் பணம் பறிக்கும் நோக்கத்துடன் டாஸ்மாக் கடையை குறிவைத்து தொடர்ந்து புகார்கள் அளித்து வருவதாகவும் குற்றச்சாட்டுகள் முன்வைக்கப்படுகின்றன. குறிப்பாக, சாயர்புரம் பகுதியில் உள்ள டாஸ்மாக் கடைகளில் ஒரே ஒரு பாரை மட்டும் குறிவைத்து எதிர்ப்பு நடவடிக்கைகள் நடத்தப்படுவதாகவும் கூறப்படுகிறது.
மேலும், சக்கமால்புரம் பகுதியில் செயல்படும் இந்த குழு மணல் மாஃபியா போன்ற சட்டவிரோத செயல்பாடுகளில் ஈடுபட்டு வருவதாகவும், மிரட்டல் மற்றும் பணம் கேட்டு அழுத்தம் தரும் செயல்களில் தொடர்பு உள்ளதாகவும் சிலர் குற்றம்சாட்டுகின்றனர். இந்த குற்றச்சாட்டுகள் தொடர்பாக காவல்துறை முழுமையான விசாரணை நடத்தி உண்மை நிலையை வெளிச்சத்துக்கு கொண்டு வர வேண்டும் என பொதுமக்கள் கோரிக்கை விடுத்துள்ளனர். எனினும், இந்த குற்றச்சாட்டுகள் குறித்து அதிகாரப்பூர்வ உறுதிப்படுத்தல் எதுவும் வெளியாகவில்லை.
இதற்கு பதிலளிக்கும் வகையில், டாஸ்மாக் கடைக்கு ஆதரவான தரப்பினர், “கடை அருகில் கோவில், கல்லூரி போன்றவை மிகவும் அருகில் உள்ளதாக கூறப்படுவது உண்மைக்கு புறம்பானது. பல்வேறு துறை அதிகாரிகள் ஆய்வு மேற்கொண்டு விதிமுறைகளுக்கு உட்பட்டே கடை இயங்கி வருவதாக தெரிவித்துள்ளனர்” எனக் கூறுகின்றனர்.
மேலும், “மாமூல் கேட்டு மிரட்டிய பின்னரும் அது நிறைவேறாததால், கடையை அகற்றும் நோக்கில் பொய்யான தகவல்கள் பரப்பப்படுகின்றன” என்றும் அவர்கள் குற்றஞ்சாட்டியுள்ளனர்.
இந்த விவகாரம் தொடர்பாக உண்மை நிலையை காவல்துறை மற்றும் மாவட்ட நிர்வாகம் முழுமையாக விசாரித்து, சட்டப்படி உரிய நடவடிக்கை எடுக்க வேண்டும் என சமூக ஆர்வலர்கள் மற்றும் பொதுமக்கள் கோரிக்கை விடுத்துள்ளனர்.
இந்த விவகாரம் தொடர்பாக காவல்துறை மற்றும் மாவட்ட நிர்வாகம் விரிவான விசாரணை நடத்தி, பொய்யான புகார்கள் மற்றும் சட்டவிரோத அழுத்தங்கள் உள்ளதா என்பதை கண்டறிந்து உரிய நடவடிக்கை எடுக்க வேண்டும் என பொதுமக்கள் மற்றும் சமூக ஆர்வலர்கள் வலியுறுத்தியுள்ளனர்.
