மதுரை மாநகராட்சியின் திமுக மேயர் இந்திராணி இன்று திடீரென்று தனது பதவியை ராஜினாமா செய்தார். மதுரை மாநகராட்சியில் சொத்து வரி முறைகேடு புகார் எழுந்தது. ரூ.150 கோடி வரை முறைகேடு செய்ததாக கூறப்பட்டது.
இதுபற்றி விசாரணை நடத்திய போலீசார் அரசு அதிகாரிகள் உள்பட 19 பேரை கைது செய்தனர். மாநகராட்சி மேயர் இந்திராணியின் கணவர் பொன்வசந்தும் போலீசில் சிக்கினர். அவரும் கைது செய்யப்பட்டார்.
தற்போது பொன் வசந்த் ஜாமீனில் வெளியே வந்துள்ளார். இதன் தொடர்ச்சியாக தான் திடீரென்று மேயர் இந்திராணி தனது மேயர் பொறுப்பை ராஜினாமா செய்துள்ளார். இதற்கான கடிதத்தை அவர் மாநகராட்சி ஆணையர் சித்ரா விஜயனிடம் வழங்கினார். இந்த கடிதம் இன்னும் அங்கீகரிக்கப்படவில்லை.
நாளை மறுநாள் (வெள்ளிக்கிழமை) மதுரை மாநகராட்சியில் சிறப்பு கூட்டத்துக்கு அழைப்பு விடுக்கப்பட்டுள்ளது. அந்த கூட்டத்தில் இந்திராணியின் பதவி விலகல் கடிதம் ஏற்கப்படும் என்று எதிர்பார்க்கப்பட்டுள்ளது. அந்த கடிதத்தில் குடும்ப சூழல் காரணமாக தான் பதவி விலகுவதாக அவர் குறிப்பிட்டுள்ளதாக தகவல்கள் வெளியாகி உள்ளது.
